Qendra Shqiptare për Popullsinë dhe Zhvillimin, në bashkëpunim me Bashkinë Pogradec dhe me mbështetjen e UNFPA Shqipëri, organizoi me sukses një tryezë diskutimi me anëtarët e Ekipit Teknik Ndërdisiplinar (ETN) të Mekanizmit të Koordinuar të Referimit (MKR) të Bashkisë Pogradec më 22 Tetor 2024.

Ky aktivitet kishte për qëllim rritjen e efektivitetit të MKR në Pogradec, përmes përmirësimit të bashkëpunimit ndërmjet anëtarëve të rinj të MKR dhe komuniteteve fetare, me të cilat vitin e kaluar u nënshkrua një marrëveshje bashkëpunimi.

Diskutimet u përqendruan në koordinimin e veprimeve për parandalimin dhe menaxhimin e dhunës në familje dhe dhunës me bazë gjinore, si dhe në riintegrimin afatgjatë të viktimave. Pjesëmarrësit ndanë ide të vlefshme për përmirësimin e funksionimit të MKR dhe rritjen e bashkëpunimit mes aktorëve të përfshirë.